فتحت الفنانة المصرية مها أحمد النار على فنانين مشهورين وهاجمتهم عبر حسابها الرسمي على موقع التواصل الاجتماعي، لكنها لم تذكر أسماء هؤلاء الفنانين، بل ذكرت أنهم شاركوا في دراما رمضان هذا العام.
وكتبت مها أحمد: "عوضي على الله دي الجملة اللي دايمًا بقولها لما اتصدم فأشخاص، الحكاية يا سادة نجمين عملوا مسلسل واتنجمت عليهم بنوته لسة ألف باء تمثيل واديتهم على قفاهم وركبت عليهم إلى أن أصبحت بطلة المسلسل وبطلة الدعاية للمسلسل وهما راضيين رغم أن طول عمرهم مبيعملوش كدة مع أي زميلة لهم أقربها أنا".
وأضافت: "النجم الأول بيني وبينه عيش وملح وزماله رشحت فمسلسل بطولته وكان بيقنعني بدور ولما وافقت بعتولي دور تاني معرفوش دور متعملوش واحدة مبتدئة، المفروض أنه عارف قيمتي الفنية وعارف اني إضافة له، اتهرب مني وموقفش جنبي وباعني رغم إن الكل عارف إني زي أخته (ندل)".
وتابعت: "اما التاني كان فبداياته يتمنى يسلم عليا ويقولي يا استاذه نزلت من نفسي وقلتله مش هنشتغل مع بعض ما هي الحوجة مرة رد وقالي الدور بينادي صاحبه. طبعا محكلكوش قد ايه ندمت نفسي وعشت أسود أيام حياتي عياط واكتئاب. وقلت (عوضي عليك يارب). تمر الأيام والاتنين يعلو ويتجمعوا مع بعض فمسلسل واحد (على عينهم طبعا) ويمثلوا وحش قوي تمثيل الكفار وطلعوا كمان مبيقروش اللي بيمثلوه وربنا يركب عليهم بنوته سنة أولى تمثيل وخبره ويتحول المسلسل والدعاية الدراما كامله لصالحها وهما (مخدماتيه للأستاذه)".
واختتمت قائلة: "يمهل ولا يهمل إبدوا من جديد يا أوفر تمثيل ياللى مبتقروش يا كمبارس جنب النجمة. نصيحة بلاش تتشطروا على اللى كان بينكم وبينهم عيش وملح بلاش تتشطروا على اساتذتكوا. (عوضنا على الله). يارب متحوجنا لحد حتى ولو كان أقرب الناس لينا".
وقد تفاعل عدد كبير من الجمهور مع منشور مها أحمد وقال البعض إنها تقصد الفنانين أمير كرارة وأحمد السقا والفنانة مي عمر.
