أعلن الملحن المصري محمد رحيم عزمه مقاضاة صناع أغنية “علشان نفهم بعض”، التي تجمع على طريقة الديو كل من النجم المصري محمد منير والشاب خالد ومغني الراب أمير عيد، متهما إياهم بالسطو على لحن أغنيته للنجم الشاب مامي، منوهًا إلى الضرر المعنوي الذي يتعرض له بسبب عرض الأغنية أكثر من مرة يوميًا في شهر رمضان الجاري ضمن حملة إعلانية لأحد البنوك المصرية.

رحيم كتب منشورا مطولًا كشف من خلاله تفاصيل السطو على لحن أغنيته وقال عبر حسابه الشخصي بموقع “فيسبوك”: وكالعادة وزي مانا متعود كل سنه الاقي في رمضان لحن من الحاني نازل في أحد الإعلانات أو المسلسلات بدون استئذان أو تصريح مني أو من الشاعر والمرة دي الضرر كبير جدا لأنه تم سرقه لحني ووضعه في واحد من أكبر الحملات الدعائية واللى بيغنيه قطبين كبيرين من اقطاب الأغنية العربية الفنان محمد منير والشاب خالد”.

تابع رحيم قائلا: “والغريبة ان النحت والاستخفاف بحقوق المؤلف والملحن خلى القائمين على العمل يقنعوا الشاب خالد يغني جمله اللحن اللي كنت عاملها للمطرب الكبير المنافس له (الشاب مامي) من سنه 2007 يعني من 15 سنه بدون الرجوع ليا ولا لورثه الشاعر عبد العزيز عمار شاعر الاغنية الاصلية الله يرحمه”.

وواصل مستنكرا واقعة السطو بقوله: “ازاي انتوا مستخفين بالقضاء والقوانين كده؟؟ وازاي انتوا ناس مجردين من المهنية ومش بتحترموا ولا الجمهور ولا الزملاء ؟؟ وازاي انتوا بتسرقوا الأعمال في وضح النهار ليستفيد بنك من بنوك الدولة مستخفين بحكومة نفس الدولة وكأنكوا واثقين ان مفيش حد هيعملكوا حاجه ولا حد هيعاقب اللى سرق واعتدى والله العظيم حرام مجهود السنين يترمي على الارض كده قدام عين الواحد وهو حي يرزق ايه الاستخفاف والاستهانه دي بالبلد وبقوانينها وقضائها !!!؟؟؟؟”.

واضاف: “كنتوا هتخسروا أيه لما تفهموا بتوع بنك القاهره ان انتوا مستعملين ألحان من ناس مختلفة والالحان دي ليها أصحاب وكنتوا تواصلتوا بشكل محترف ومحترم علشان تحصل على تصريح قانوني باستعمال اللحن وتعفي نفسك من السرقة يا فنان ويا جهة الانتاج وتعفي اداره البنك من تهمه التعدي على أعمال الناس بالعكس كان هيبقى سلوك محترم واحترافي واخلاقي!!”.

وواصل قائلا: “بس انا واثق في ربنا سبحانه وتعالى ثم في القضاء المصري انه هيرجعلي حقي وحق الشاعر المرحوم عبد العزيز عمار اللى بجد أولاده اولى بفلوس ابوهم اللى شوهتوا وحرفتوا كلمات أغنيته بعد ما رحل من 10سنين وزي ما اولاد كل حد فينا اولى بمجهود ابائهم اللى اجتهدوا وتعبوا علشان يعملوا أعمال ناجحة لسه بيتنحت فيها لحد النهاردة من أنصاف وأرباع الموهوبين”.

وتابع رحيم قائلا: “المشكلة الأكبر ان الملكية الفكرية دي بتشارك في الدخل القومي في كل بلاد العالم وبتأثر في اقتصاديات الدول وكل العالم يعلم اهميه القوى الناعمة المصرية في شتى المجالات لكن للأسف فيه ناس لسه عايشه على سياسه القتل المعنوي والمادي للفنان والمبدع المصري حيا وميتا”.

واختتم بيانه قائلا: “وبعدين لما بتعملوا كده في اعمالي وانا عضو محترف في جمعيه SACEM الفرنسية ومعايا شهاده الاحتراف الدولية وعضو عامل في جمعيه ساسيرو المصرية للمؤلفين والملحنين وعضو عامل في نقابه المهن الموسيقية واعمالى واضحه واسمي معروف الحمد لله ومسيرتي 25 سنه اومال تعملوا ايه في الملحن والشاعر اللى لسه بيبتدي وبيقول يارب أكرمني !!!؟؟؟؟ إلى القضاء ان شاء الله يا أنصاف الموهوبين”.